പാർക്കിലും ബീച്ചിലും ഇനി കൂടുതൽ വിനോദം; പുതിയ അനുഭവങ്ങളുമായി ദുബായ് പാർക്കുകൾ

ദുബായ്,സെപ്റ്റംബർ 14,2026 : താമസിക്കാനും സന്ദർശിക്കാനും ലോകത്തെ മികച്ച നഗരങ്ങളിലൊന്നെന്ന ദുബായിയുടെ ആകർഷണം കൂടുതൽ ശക്തമാക്കി പൊതുഇടങ്ങളിലെ സന്ദർശകരുടെ എണ്ണത്തിൽ വൻ വർധന. 2026ലെ ആദ്യ ആറുമാസത്തിൽ ദുബായ് മുനിസിപ്പാലിറ്റിയുടെ പൊതുപാർക്കുകളിലെ സന്ദർശനം കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 18 ശതമാനം വർധിച്ചു. ഖുർആനിക് പാർക്കിൽ 47 ശതമാനവും മുഷ്‌രിഫ് നാഷനൽ പാർക്കിൽ 20 ശതമാനവുമാണ് സന്ദർശകരുടെ എണ്ണത്തിലുണ്ടായ വർധന.

അറേബ്യൻ ട്രാവൽ മാർക്കറ്റിൽ ദുബായ് മുനിസിപ്പാലിറ്റി അവതരിപ്പിച്ച റിപ്പോർട്ടിലാണ് നഗരത്തിലെ പൊതുപാർക്കുകൾ, ബീച്ചുകൾ, പ്രകൃതിദൃശ്യ കേന്ദ്രങ്ങൾ, വിനോദസഞ്ചാര കേന്ദ്രങ്ങൾ എന്നിവയിലുണ്ടായ വളർച്ച വ്യക്തമാക്കിയത്. ദുബായ് ഫ്രെയിം ഉൾപ്പെടെയുള്ള പ്രമുഖ കേന്ദ്രങ്ങൾക്കൊപ്പം കഴിഞ്ഞ ഒരു വർഷത്തിനിടെ തുറന്ന പുതിയ പദ്ധതികളും ഉടൻ തുറക്കാനിരിക്കുന്ന കേന്ദ്രങ്ങളും മുനിസിപ്പാലിറ്റി പ്രദർശിപ്പിക്കുന്നുണ്ട്.

ദുബായ് ഫ്രെയിമിലെത്തിയത് 88 ലക്ഷം പേർ

ദുബായിയുടെ ചരിത്രവും വർത്തമാനവും ഭാവിയും ഒരേ കേന്ദ്രത്തിൽനിന്ന് അനുഭവിക്കാനാകുന്ന ദുബായ് ഫ്രെയിമിൽ ഇതുവരെ ഏകദേശം 88 ലക്ഷം പേരാണ് സന്ദർശനം നടത്തിയത്. നഗരത്തിന്റെ ശ്രദ്ധേയമായ വിനോദസഞ്ചാര കേന്ദ്രങ്ങളിലൊന്നായി ദുബായ് ഫ്രെയിം തുടരുകയാണെന്ന് മുനിസിപ്പാലിറ്റി വ്യക്തമാക്കി.

പുനർവികസിപ്പിച്ച അൽ മം‌സർ ബീച്ചിന്റെ ആദ്യഘട്ടമായ അൽ മം‌സർ അൽ ഖോർ മേയിൽ തുറന്നതിനു ശേഷം ഇതുവരെ 17.5 ലക്ഷത്തിലേറെ സന്ദർശകരെ സ്വീകരിച്ചു.

ഇതോടെ ദുബായ് മുനിസിപ്പാലിറ്റിയുടെ പൊതുബീച്ചുകളുടെ എണ്ണം ഏഴായി. നിലവിൽ ഒരുക്കങ്ങൾ പുരോഗമിക്കുന്ന അൽ മം‌സർ കോർണിഷ് തുറക്കുന്നതോടെ എണ്ണം എട്ടാകും.

24 മണിക്കൂറും സ്ത്രീകൾക്കായി മാത്രം തുറന്നിരിക്കുന്ന ലോകത്തിലെ ആദ്യ

നൈറ്റ് ബീച്ച് ഉൾപ്പെടെയുള്ള പുതിയ വിനോദ, കായിക സൗകര്യങ്ങളും അൽ മം‌സർ കോർണിഷിൽ ഒരുക്കുന്നുണ്ട്. പ്രകൃതിയുടെയും വിനോദത്തിന്റെയും കേന്ദ്രമായി മാറുന്ന മുഷ്‌രിഫ് നാഷനൽ പാർക്കിലും സന്ദർശകരുടെ എണ്ണം വർധിക്കുകയാണ്. പാർക്കിൽ പുതുതായി തുറന്ന യങ് റേഞ്ചേഴ്സ് സൈക്ലിങ് ട്രാക്കിൽ ഇതിനകം 18,000ത്തിലേറെ പേർ എത്തിയതായി മുനിസിപ്പാലിറ്റി അറിയിച്ചു. മൗണ്ടൻ ബൈക്കിങ്, ഹൈക്കിങ്, കുടുംബ വിനോദങ്ങൾ തുടങ്ങിയവയ്ക്കുള്ള സൗകര്യങ്ങളും പാർക്കിൽ വിപുലീകരിച്ചുവരികയാണ്.

About The Author

web admin

See author's posts