നഗരാസൂത്രണത്തിന് സാങ്കേതിക കരുത്ത്; ഡിജിറ്റൽ ട്വിൻ കൺസോർഷ്യത്തിൽ അംഗമായി ദുബായ് മുനിസിപ്പാലിറ്റി

ദുബായ്, ഒക്ടോബർ 5, 2026: നഗരാസൂത്രണത്തിലും അടിസ്ഥാനസൗകര്യ വികസനത്തിലും നൂതന സാങ്കേതികവിദ്യകളുടെ ഉപയോഗം വിപുലീകരിക്കാൻ ഡിജിറ്റൽ ട്വിൻ കൺസോർഷ്യത്തിൽ (ഡിടിസി) അംഗത്വം നേടി ദുബായ് മുനിസിപ്പാലിറ്റി. ഡിജിറ്റൽ ട്വിൻ സാങ്കേതികവിദ്യകളും മാനദണ്ഡങ്ങളും വികസിപ്പിക്കുന്ന സർക്കാർ സ്ഥാപനങ്ങൾ, കമ്പനികൾ, സംഘടനകൾ, വിദഗ്ധർ എന്നിവരുടെ അന്തർദേശീയ കൂട്ടായ്മയാണ് കൺസോർഷ്യം.

നഗരത്തിലെ കെട്ടിടങ്ങളും അടിസ്ഥാനസൗകര്യങ്ങളും ഉൾപ്പെടുന്ന ഭൗതിക പരിസരത്തിന്റെ ഡിജിറ്റൽ പ്രതിരൂപം സൃഷ്ടിച്ച് ആസൂത്രണത്തിനും വിശകലനത്തിനും ഉപയോഗിക്കുന്നതാണ് ഡിജിറ്റൽ ട്വിൻ സാങ്കേതികവിദ്യ. നഗരനിർവഹണം കൂടുതൽ കാര്യക്ഷമമാക്കാനും വിവരങ്ങളുടെ അടിസ്ഥാനത്തിൽ തീരുമാനങ്ങളെടുക്കാനും ഇത് സഹായിക്കുന്നു.

ആഗോള വൈദഗ്ധ്യം ദുബായിയുടെ വികസനത്തിന്

അംഗത്വത്തിലൂടെ പ്രത്യേക പ്രവർത്തകസംഘങ്ങളിലും പദ്ധതികളിലും മുനിസിപ്പാലിറ്റിക്ക് പങ്കാളിയാകാം. അന്തർദേശീയ സ്ഥാപനങ്ങളുമായി അറിവും അനുഭവങ്ങളും കൈമാറുന്നതിനൊപ്പം പുതിയ സാങ്കേതികവിദ്യകളും അവയുടെ പ്രയോഗങ്ങളും വിലയിരുത്താനും അവസരം ലഭിക്കും. ഡിജിറ്റൽ ട്വിൻ മാനദണ്ഡങ്ങളുടെ വികസനവുമായി ബന്ധപ്പെട്ട ചർച്ചകളിലും പങ്കാളിത്തമുണ്ടാകും.

നഗരാസൂത്രണം, അടിസ്ഥാനസൗകര്യ വികസനം, ആസ്തി പരിപാലനം തുടങ്ങിയ മേഖലകളിൽ ഭൗമസ്ഥാന വിവരങ്ങളും ഡിജിറ്റൽ ട്വിൻ സാങ്കേതികവിദ്യയും കൂടുതൽ ഫലപ്രദമായി ഉപയോഗിക്കാനാണ് ലക്ഷ്യം.

ജിഐഎസ് സെന്ററിന്റെ പ്രവർത്തനങ്ങളെ കൂടുതൽ ശക്തിപ്പെടുത്തുന്നതാണ് അംഗത്വമെന്ന് ദുബായ് മുനിസിപ്പാലിറ്റിയുടെ ബിൽഡിങ് റെഗുലേഷൻ ആൻഡ് പെർമിറ്റ്സ് ഏജൻസി സിഇഒ എൻജിനീയർ മറിയം അൽ മുഹൈരി പറഞ്ഞു. ഡിജിറ്റൽ ട്വിൻ, നിർമിതബുദ്ധി, വിവരവിശകലനത്തിലൂടെയുള്ള മുൻകൂട്ടിയുള്ള വിലയിരുത്തൽ തുടങ്ങിയ മേഖലകളിലെ ആഗോള അനുഭവങ്ങൾ ദുബായിയുടെ സുസ്ഥിര നഗരവികസനത്തിന് സഹായിക്കുമെന്നും അവർ വ്യക്തമാക്കി.

1.95 ലക്ഷത്തിലധികം കെട്ടിടങ്ങളുടെ ത്രിമാന മാതൃകകൾ

യുകെയിലെ ലീഡ്‌സ് സർവകലാശാലയിൽ നടന്ന കൺസോർഷ്യത്തിന്റെ മൂന്നാം പാദ അംഗയോഗത്തിലും ദുബായ് മുനിസിപ്പാലിറ്റിയുടെ ജിഐഎസ് സെന്റർ പ്രതിനിധികൾ പങ്കെടുത്തു. പത്ത് രാജ്യങ്ങളിൽ നിന്നുള്ള പ്രതിനിധികൾ സാങ്കേതികവിദ്യകളും അനുഭവങ്ങളും യോഗത്തിൽ അവതരിപ്പിച്ചു.

ദുബായിലെ 1,95,000ത്തിലധികം കെട്ടിടങ്ങളുടെ ത്രിമാന മാതൃകകൾ മുനിസിപ്പാലിറ്റി യോഗത്തിൽ പ്രദർശിപ്പിച്ചു. എമിറേറ്റിലെ വിവിധ യൂട്ടിലിറ്റി സ്ഥാപനങ്ങളുമായി സഹകരിച്ച് വികസിപ്പിച്ച, ഡിജിറ്റൽ ട്വിൻ പ്ലാറ്റ്‌ഫോമും നോ ഒബ്ജക്ഷൻ സർട്ടിഫിക്കറ്റ് (എൻഒസി) സംവിധാനവും തമ്മിലുള്ള സാങ്കേതിക സംയോജനവും അവതരിപ്പിച്ചു.

നഗരവുമായി ബന്ധപ്പെട്ട വിവരങ്ങളെയും പ്രവർത്തന സംവിധാനങ്ങളെയും ബന്ധിപ്പിക്കുന്ന ഈ സംയോജനം അടിസ്ഥാനസൗകര്യ പദ്ധതികളുടെ ഏകോപനത്തിനും യഥാർഥ സാഹചര്യങ്ങൾ ഡിജിറ്റലായി അനുകരിച്ച് വിലയിരുത്തുന്നതിനും സഹായിക്കുന്നു. നഗരാസൂത്രണവും സേവനവിതരണവും മെച്ചപ്പെടുത്തുന്നതിനും ഇത് പിന്തുണ നൽകും.

ആഗോള അനുഭവങ്ങളെ ദുബായിക്ക് പ്രായോഗികമായി പ്രയോജനപ്പെടുന്ന പരിഹാരങ്ങളാക്കി മാറ്റുന്നതിനാണ് മുൻഗണനയെന്ന് ജിഐഎസ് സെന്റർ ഡയറക്ടർ എൻജിനീയർ മൈത അൽ നുഐമി പറഞ്ഞു. സർക്കാർ സ്ഥാപനങ്ങൾക്ക് കൂടുതൽ കൃത്യമായ തീരുമാനങ്ങളെടുക്കാനും നഗരത്തിന്റെ പ്രവർത്തനക്ഷമതയും ഭാവി സജ്ജതയും മെച്ചപ്പെടുത്താനും ഈ സഹകരണം സഹായിക്കുമെന്നും അവർ വ്യക്തമാക്കി.

About The Author

web admin

See author's posts