ഷാർജ, ഒക്ടോബർ 21, 2026 : നഗരാസൂത്രണ, സർവേ വകുപ്പിന്റെ പ്രവർത്തനം ക്രമീകരിക്കുന്ന കരട് നിയമത്തിന് ഷാർജ എക്സിക്യൂട്ടീവ് കൗൺസിൽ അംഗീകാരം നൽകി. എമിറേറ്റിലെ അപകടപ്രതിരോധ പരിശീലന പ്രവർത്തനങ്ങൾ ക്രമീകരിക്കുന്ന പ്രമേയവും കൗൺസിൽ പുറത്തിറക്കി.
ഷാർജ കിരീടാവകാശിയും ഉപഭരണാധികാരിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് സുൽത്താൻ ബിൻ മുഹമ്മദ് ബിൻ സുൽത്താൻ അൽ ഖാസിമിയുടെ അധ്യക്ഷതയിൽ ചൊവ്വാഴ്ച രാവിലെ ഭരണാധികാരിയുടെ കാര്യാലയത്തിൽ ചേർന്ന പ്രതിവാര യോഗത്തിലാണ് തീരുമാനങ്ങൾ. ഷാർജ ഉപഭരണാധികാരിയും കൗൺസിൽ വൈസ് ചെയർമാനുമായ ഷെയ്ഖ് ഡോ. സുൽത്താൻ ബിൻ അഹമ്മദ് ബിൻ സുൽത്താൻ അൽ ഖാസിമിയും പങ്കെടുത്തു.
എമിറേറ്റിലെ പൗരന്മാർക്കും താമസക്കാർക്കും നൽകുന്ന സേവനങ്ങളുടെ ഗുണനിലവാരം മെച്ചപ്പെടുത്തുന്നതിനായി വിവിധ സർക്കാർ വിഷയങ്ങളും വകുപ്പുകളുടെയും സ്ഥാപനങ്ങളുടെയും പൊതുനയങ്ങളും യോഗം അവലോകനം ചെയ്തു.
കരട് നിയമം കൺസൾട്ടേറ്റീവ് കൗൺസിലിന് കൈമാറും
ഷാർജയുടെ വികസനത്തിനും വളർച്ചയ്ക്കും അനുസൃതമായി നിയമങ്ങൾ പുതുക്കുക, നിയമപരമായ ചട്ടക്കൂട് ശക്തിപ്പെടുത്തുക, സർക്കാർ സേവനങ്ങൾ വിപുലപ്പെടുത്തുക എന്നീ ലക്ഷ്യങ്ങളുടെ ഭാഗമായാണ് നഗരാസൂത്രണ, സർവേ വകുപ്പുമായി ബന്ധപ്പെട്ട കരട് നിയമത്തിന് അംഗീകാരം നൽകിയത്.
തുടർചർച്ചകൾക്കും നിയമനിർമാണ നടപടികൾ പൂർത്തിയാക്കുന്നതിനുമായി കരട് ഷാർജ കൺസൾട്ടേറ്റീവ് കൗൺസിലിന് കൈമാറാൻ എക്സിക്യൂട്ടീവ് കൗൺസിൽ നിർദേശിച്ചു.
അപകടങ്ങൾ കുറയ്ക്കാൻ പരിശീലനം ശക്തമാക്കും
അപകടപ്രതിരോധ പരിശീലന പ്രവർത്തനങ്ങൾക്ക് വ്യക്തമായ ചട്ടക്കൂട് ഒരുക്കുകയാണ് പുതിയ പ്രമേയത്തിന്റെ ലക്ഷ്യം. പ്രതിരോധ, സുരക്ഷാ മേഖലകളിലെ സാങ്കേതിക ശേഷിയും ജീവനക്കാരുടെ കഴിവുകളും വികസിപ്പിക്കുക, അപകടങ്ങൾ കുറയ്ക്കുക, ജീവനും സ്വത്തിനും സംരക്ഷണം ഉറപ്പാക്കുക എന്നിവയ്ക്കാണ് പ്രാധാന്യം.
അപകടങ്ങൾ തടയേണ്ടതിന്റെ ആവശ്യകത, പ്രതിരോധ മാർഗങ്ങൾ, പൊതുസുരക്ഷയിൽ അവയുടെ പങ്ക് എന്നിവയെക്കുറിച്ച് സർക്കാർ ജീവനക്കാർക്കും തൊഴിലാളികൾക്കും പൊതുജനങ്ങൾക്കും അവബോധം നൽകും. സമൂഹത്തെയും സ്ഥാപനങ്ങളെയും അപകടങ്ങളിൽനിന്ന് സംരക്ഷിക്കുന്നതിനും നടപടി സഹായിക്കും.
പരിശീലന സ്ഥാപനങ്ങൾക്ക് അനുമതി നൽകുന്നത് ഷാർജ പൊലീസ്
പ്രമേയത്തിലെ ലക്ഷ്യങ്ങൾ നടപ്പാക്കുന്നതിനുള്ള ഷാർജ പൊലീസിന്റെ ചുമതലകളും വ്യക്തമാക്കിയിട്ടുണ്ട്. അപകടപ്രതിരോധ പരിശീലനത്തിനുള്ള ചട്ടങ്ങൾ, നിബന്ധനകൾ, മാനദണ്ഡങ്ങൾ എന്നിവ രൂപീകരിച്ച് അംഗീകരിക്കുകയും അവ ശരിയായി നടപ്പാക്കുന്നുണ്ടെന്ന് ഉറപ്പാക്കുകയും വേണം.
പരിശീലനം നൽകാൻ ആഗ്രഹിക്കുന്ന പരിശീലന സ്ഥാപനങ്ങൾക്ക് അനുമതി നൽകുന്നതും പൊലീസിന്റെ ചുമതലയാണ്. വാണിജ്യ സ്ഥാപനങ്ങളിലെയും പരിശീലന സ്ഥാപനങ്ങളിലെയും പരിശീലകരുടെ കഴിവും യോഗ്യതയും വിലയിരുത്തി അംഗീകാരം നൽകും.
സ്ഥാപനങ്ങളിലെ ജീവനക്കാരെ സജ്ജരാക്കുന്നതിനായി പ്രതിരോധ, സുരക്ഷാ പരിശീലന പരിപാടികളും വികസിപ്പിക്കും. ഈ രംഗത്ത് സർക്കാർ സ്ഥാപനങ്ങളുമായും പ്രാദേശിക, അന്താരാഷ്ട്ര സ്ഥാപനങ്ങളുമായും തന്ത്രപ്രധാന പങ്കാളിത്തങ്ങൾ സ്ഥാപിക്കുന്നതും ചുമതലകളിൽ ഉൾപ്പെടുന്നു.
ഷാർജ തൊഴിൽസുരക്ഷാ–ആരോഗ്യ സംവിധാനത്തിലെ നിബന്ധനകൾ പാലിക്കുന്നുവെന്ന് ഉറപ്പാക്കാൻ ബോധവത്കരണ പരിപാടികൾ തയ്യാറാക്കും. പരിശീലന സേവനങ്ങളുടെയും അവയുടെ ഫലങ്ങളുടെയും ഗുണനിലവാരം ഉറപ്പാക്കുന്നതിനായി എമിറേറ്റിലുടനീളമുള്ള പരിശീലന സ്ഥാപനങ്ങൾക്ക് മേൽനോട്ടവും വഹിക്കും.
സ്ഥാപനങ്ങളുടെ വർഗീകരണം, പരിശീലനം ലഭിക്കേണ്ടവരുടെ അനുപാതം, പരിശീലന പ്രവർത്തനങ്ങൾക്കുള്ള അനുമതികൾ, പരിശീലന സ്ഥാപനങ്ങളുടെയും സ്ഥാപന ഉടമകളുടെയും ബാധ്യതകൾ എന്നിവ ഉൾപ്പെടെയുള്ള നിയമവ്യവസ്ഥകളും പ്രമേയത്തിൽ വ്യക്തമാക്കിയിട്ടുണ്ട്.
About The Author
