ദുബായ്, ഒക്ടോബർ 1, 2026 : ദുബായ്–ടെൽ അവീവ് ഫ്ലൈദുബായ് വിമാനത്തിൽ യാത്രയ്ക്കിടെ ഉണ്ടായ സംഘർഷത്തെ തുടർന്ന് ലോകശ്രദ്ധ നേടിയിരിക്കുകയാണ് ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാർ. ഗുരുതരമായി പരിക്കേറ്റിട്ടും യാത്രക്കാരുടെ സുരക്ഷ ഉറപ്പാക്കാൻ അദ്ദേഹം നടത്തിയ ഇടപെടലിനെ ഇന്ത്യയിലെയും ഇസ്രായേലിലെയും അമേരിക്കയിലെയും നേതാക്കൾ അഭിനന്ദിച്ചു.
സെപ്റ്റംബർ 30ന് ഫ്ലൈദുബായിയുടെ FZ1073 വിമാനത്തിന്റെ കോക്ക്പിറ്റിലുണ്ടായ സംഘർഷത്തിലാണ് ക്യാപ്റ്റൻ മച്ചാറിന് പരിക്കേറ്റത്. തുടർന്ന് വിമാനം സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കുകയായിരുന്നു.
ആരാണ് ക്യാപ്റ്റൻ സ്മിത് മച്ചാർ?
പതിമൂന്ന് വർഷത്തിലധികം വാണിജ്യ വിമാനങ്ങൾ പറത്തിയ അനുഭവപരിചയമുള്ള ഇന്ത്യൻ പൈലറ്റാണ് സ്മിത് മച്ചാർ. ലിങ്ക്ഡ്ഇൻ പ്രൊഫൈൽ പ്രകാരം, 2022 ജൂൺ മുതലാണ് അദ്ദേഹം ദുബായ് ആസ്ഥാനമായ ഫ്ലൈദുബായിൽ ക്യാപ്റ്റനായി സേവനമനുഷ്ഠിക്കുന്നത്. ഇന്ത്യൻ വിമാനക്കമ്പനിയായ സ്പൈസ്‌ജെറ്റിൽ പത്ത് വർഷത്തിലധികം പ്രവർത്തിച്ച ശേഷമാണ് അദ്ദേഹം ഫ്ലൈദുബായിൽ ചേർന്നത്. ബോയിങ് 737 വിഭാഗത്തിലുള്ള വിമാനങ്ങളിൽ ഏകദേശം 9,750 മണിക്കൂർ പറക്കൽ പരിചയമുള്ള അദ്ദേഹം, മറ്റ് പൈലറ്റുമാർക്ക് പരിശീലനം നൽകുന്ന ലൈൻ ട്രെയിനിങ് ക്യാപ്റ്റനായും പ്രവർത്തിച്ചിട്ടുണ്ട്.
കോക്ക്പിറ്റിലെ ജാഗ്രതയെക്കുറിച്ച് നേരത്തേയും സംസാരിച്ചിരുന്നു
കഴിഞ്ഞ വർഷം ഒരു പോഡ്‌കാസ്റ്റിൽ പങ്കെടുത്തപ്പോൾ വിമാനയാത്രയ്ക്കിടയിലെ പൈലറ്റുമാരുടെ ഉത്തരവാദിത്തത്തെക്കുറിച്ച് മച്ചാർ വിശദീകരിച്ചിരുന്നു. വിമാനം പറത്തുന്നതിനിടെ ക്യാപ്റ്റനും ഫസ്റ്റ് ഓഫീസറും നിരന്തരം കാര്യങ്ങൾ നിരീക്ഷിച്ചുകൊണ്ടിരിക്കണമെന്നും അനാവശ്യമായ ദീർഘസംഭാഷണങ്ങൾ ഒഴിവാക്കണമെന്നും അദ്ദേഹം പറഞ്ഞിരുന്നു. ഇരുവരുടെയും ശ്രദ്ധ ഒരേസമയം സംഭാഷണത്തിലേക്ക് മാറുന്നത് ഒഴിവാക്കാനാണ് താൻ ശ്രമിക്കാറുള്ളതെന്നും അദ്ദേഹം വ്യക്തമാക്കിയിരുന്നു. അടിയന്തര സാഹചര്യങ്ങളിൽ ക്യാബിൻ ക്രൂവിന്റെ പങ്ക് എത്രത്തോളം പ്രധാനമാണെന്നും അദ്ദേഹം ആ അഭിമുഖത്തിൽ ചൂണ്ടിക്കാട്ടിയിരുന്നു.
ലോകനേതാക്കളുടെ അഭിനന്ദനം
സംഭവത്തിൽ പരിക്കേറ്റിട്ടും ക്യാപ്റ്റൻ മച്ചാർ പ്രകടിപ്പിച്ച ധൈര്യത്തെ ആദ്യം അഭിനന്ദിച്ച് രംഗത്തെത്തിയത് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവാണ്. പരിക്കേറ്റിട്ടും ആക്രമണത്തെ ചെറുക്കുകയും കോക്ക്പിറ്റ് വാതിൽ തുറന്ന് യാത്രക്കാർക്കും ജീവനക്കാർക്കും ഇടപെടാൻ അവസരമൊരുക്കുകയും ചെയ്തതായി അദ്ദേഹം പറഞ്ഞു. വലിയൊരു വ്യോമദുരന്തം ഒഴിവാക്കുന്നതിൽ മച്ചാറിന്റെ ഇടപെടൽ നിർണായകമായിരുന്നുവെന്നും നെതന്യാഹു അഭിപ്രായപ്പെട്ടു.
തുടർന്ന് അമേരിക്കൻ പ്രസിഡന്റ് ഡൊണാൾഡ് ട്രംപും മച്ചാറിന്റെ ധൈര്യത്തെ അഭിനന്ദിച്ചു. അദ്ദേഹത്തെ ഹീറോയെന്നാണ് ട്രംപ് വിശേഷിപ്പിച്ചത്.
ഇന്ത്യൻ പ്രധാനമന്ത്രി നരേന്ദ്ര മോദിയും ക്യാപ്റ്റൻ മച്ചാറിനെ പ്രശംസിച്ച് രംഗത്തെത്തി. പ്രതിസന്ധി ഘട്ടത്തിൽ അദ്ദേഹം പ്രകടിപ്പിച്ച ധൈര്യത്തിൽ ഇന്ത്യയ്ക്ക് അഭിമാനമുണ്ടെന്ന് മോദി വ്യക്തമാക്കി.
സൗദിയിൽ ചികിത്സ തുടരുന്നു
സംഭവത്തിൽ പരിക്കേറ്റ ക്യാപ്റ്റൻ മച്ചാർ സൗദി അറേബ്യയിലെ തബൂക്കിലുള്ള ആശുപത്രിയിൽ ചികിത്സയിലാണ്. അദ്ദേഹത്തിന്റെ ആരോഗ്യനില തൃപ്തികരമാണെന്നാണ് പ്രാഥമിക വിവരം. റിയാദിലെ ഇന്ത്യൻ എംബസിയും ജിദ്ദയിലെ ഇന്ത്യൻ കോൺസുലേറ്റും അദ്ദേഹത്തിന്റെ ആരോഗ്യസ്ഥിതി നിരീക്ഷിച്ചുവരികയാണ്. കുടുംബവുമായി ബന്ധപ്പെടുന്നുണ്ടെന്നും സൗദി അധികൃതരുമായി സഹകരിച്ച് ആവശ്യമായ സഹായങ്ങൾ ഉറപ്പാക്കുമെന്നും ഇന്ത്യൻ എംബസി അറിയിച്ചു.
അതേസമയം, വിമാനത്തിലുണ്ടായ സംഘർഷത്തിന്റെ കാരണങ്ങളെക്കുറിച്ചുള്ള ഔദ്യോഗിക അന്വേഷണം തുടരുകയാണ്.
About The Author
