ലോക സഞ്ചാരികളുടെ ഇഷ്ടകേന്ദ്രമായി ദുബായ്; 2026ൽ ഇതുവരെ എത്തിയത് 69.7 ലക്ഷം പേർ

ദുബായ്,സെപ്റ്റംബർ 14,2026 : ടൂറിസം മേഖലയിൽ കുതിപ്പ് തുടർന്ന് ദുബായ്. ഈ വർഷം ജനുവരി മുതൽ ഓഗസ്റ്റ് വരെ 69.7 ലക്ഷം അന്താരാഷ്ട്ര സന്ദർശകരാണ് ദുബായിലെത്തിയത്. ഓഗസ്റ്റിൽ മാത്രം 8.69 ലക്ഷം പേരെത്തി. ഫെബ്രുവരിക്ക് ശേഷമുള്ള ഏറ്റവും ഉയർന്ന പ്രതിമാസ സന്ദർശകസംഖ്യയാണിത്. അറേബ്യൻ ട്രാവൽ മാർക്കറ്റ് 2026ന് തുടക്കമാകുന്ന പശ്ചാത്തലത്തിലാണ് ദുബായ് ഡിപ്പാർട്ട്‌മെന്റ് ഓഫ് ഇക്കണോമി ആൻഡ് ടൂറിസം പുതിയ കണക്കുകൾ പുറത്തുവിട്ടത്. മാർച്ചിന് ശേഷം തുടർച്ചയായി രണ്ടക്ക വളർച്ചയാണ് മാസാടിസ്ഥാനത്തിൽ സന്ദർശകരുടെ എണ്ണത്തിൽ രേഖപ്പെടുത്തിയത്.

സഞ്ചാരികളുടെ വരവ് വർധിച്ചതിനൊപ്പം ഹോട്ടൽ മേഖലയിലും മികച്ച പ്രകടനമാണ് ദുബായ് രേഖപ്പെടുത്തുന്നത്. ഓഗസ്റ്റിൽ ഹോട്ടലുകളിലെ താമസനിരക്ക് 66 ശതമാനമായി. മാർച്ചിൽ ഇത് 36 ശതമാനമായിരുന്നു. ജനുവരി മുതൽ ഓഗസ്റ്റ് വരെ 21.61 ലക്ഷം ഹോട്ടൽ റൂം രാത്രികളാണ് ഉപയോഗിച്ചത്. ഓഗസ്റ്റ് അവസാനത്തോടെ ദുബായിലെ ഹോട്ടൽ മുറികളുടെ എണ്ണം 1.49 ലക്ഷത്തോട് അടുത്തു. അതിഥികളുടെ അനുഭവം മെച്ചപ്പെടുത്തുന്നതിനായി നിരവധി ഹോട്ടലുകൾ നവീകരണ പ്രവർത്തനങ്ങളും ആരംഭിച്ചിട്ടുണ്ട്.

യൂറോപ്പിൽനിന്ന് കൂടുതൽ സഞ്ചാരികൾ

വിവിധ രാജ്യങ്ങളിൽനിന്നുള്ള സഞ്ചാരികളാണ് ദുബായിലെത്തുന്നത്. ജനുവരി മുതൽ ഓഗസ്റ്റ് വരെയുള്ള കണക്കിൽ പടിഞ്ഞാറൻ യൂറോപ്പാണ് മുന്നിൽ. ആകെ സന്ദർശകരിൽ 20 ശതമാനം ഈ മേഖലയിൽ നിന്നാണ്. ദക്ഷിണേഷ്യയിൽനിന്ന് 17 ശതമാനവും ഗൾഫ് രാജ്യങ്ങളിൽനിന്ന് 16 ശതമാനവും സിഐഎസ്, കിഴക്കൻ യൂറോപ്പ് മേഖലകളിൽനിന്ന് 14 ശതമാനവും സന്ദർശകരെത്തി. വൈവിധ്യമാർന്ന രാജ്യങ്ങളിൽനിന്നുള്ള സഞ്ചാരികളുടെ വരവ് ദുബായുടെ ആഗോള ടൂറിസം കേന്ദ്രമെന്ന നിലയിലുള്ള കരുത്താണ് വ്യക്തമാക്കുന്നതെന്ന് അധികൃതർ പറഞ്ഞു.

ട്രാവൽ മാർക്കറ്റിന് ഇന്ന് തുടക്കം

സെപ്റ്റംബർ 14 മുതൽ 17 വരെ ദുബായ് വേൾഡ് ട്രേഡ് സെന്ററിലാണ് 33-ാമത് അറേബ്യൻ ട്രാവൽ മാർക്കറ്റ് നടക്കുന്നത്. ലോകത്തിന്റെ വിവിധ ഭാഗങ്ങളിൽനിന്നുള്ള യാത്രാ, ടൂറിസം മേഖലയിലെ പ്രമുഖർ പരിപാടിയിൽ പങ്കെടുക്കും. ദുബായ് ഡിപ്പാർട്ട്‌മെന്റ് ഓഫ് ഇക്കണോമി ആൻഡ് ടൂറിസത്തിനൊപ്പം ഹോട്ടൽ ഗ്രൂപ്പുകൾ, വിനോദസഞ്ചാര കേന്ദ്രങ്ങൾ, വിമാനക്കമ്പനികൾ, ഡെസ്റ്റിനേഷൻ മാനേജ്മെന്റ് കമ്പനികൾ തുടങ്ങിയ മേഖലകളിൽനിന്നുള്ള 115ലേറെ സഹപ്രദർശകരും പങ്കെടുക്കുന്നുണ്ട്. 40ലേറെ രാജ്യങ്ങളിൽനിന്നുള്ള 300ലധികം അന്താരാഷ്ട്ര ട്രാവൽ വ്യാപാര പ്രതിനിധികളെയും പരിപാടിയുടെ ഭാഗമായി ദുബായിലെത്തിക്കും.

പുതിയ വിപണികളിൽനിന്നുള്ള സഞ്ചാരികളെ ആകർഷിക്കുന്നതിനും നിലവിലുള്ള വിപണികളിൽ ആവശ്യകത വർധിപ്പിക്കുന്നതിനും ട്രാവൽ മാർക്കറ്റ് വേദിയാക്കുകയാണ് ദുബായുടെ ലക്ഷ്യം. ഈ വർഷം ടൂറിസം, ഹോസ്പിറ്റാലിറ്റി, വിനോദ മേഖലകൾക്ക് നേരിട്ട് പിന്തുണ നൽകുന്നതിനായി ദുബായ് സർക്കാർ 250 കോടി ദിർഹത്തിന്റെ പാക്കേജ് പ്രഖ്യാപിച്ചിരുന്നു. ആഗോള വിമാന ബന്ധവും ശക്തമായി തിരിച്ചുവരികയാണ്. എമിറേറ്റ്സ് ആഗോള ശൃംഖലയുടെ 97 ശതമാനവും പുനഃസ്ഥാപിച്ചതായും അധികൃതർ അറിയിച്ചു. ടൂറിസം മേഖലയിലെ തുടർച്ചയായ നിക്ഷേപവും പുതിയ അനുഭവങ്ങളും ആഗോള കണക്ടിവിറ്റിയും ദുബായിലേക്കുള്ള സഞ്ചാരികളുടെ വരവ് കൂടുതൽ ശക്തമാക്കുമെന്നാണ് പ്രതീക്ഷ.

About The Author

web admin

See author's posts