ദുബായ്,ഒക്ടോബർ 20,2026 : ഓൺലൈൻ തട്ടിപ്പുകളിൽ നിന്ന് സ്വയം സംരക്ഷിക്കാനും സുരക്ഷാ അപകടങ്ങൾ തിരിച്ചറിയാനും റോഡുകളിൽ സുരക്ഷിതരായി സഞ്ചരിക്കാനും തൊഴിലാളികൾക്ക് ബോധവൽക്കരണം നൽകുന്നതിനായി ദുബായ് പൊലീസ് സംഘടിപ്പിച്ച രണ്ട് പരിപാടികളിലൂടെ ഏകദേശം 2,850 പേരിലെത്തി. ജബൽ അലി, ദുബായ് ഇൻവെസ്റ്റ്മെന്റ്സ് പാർക്ക് എന്നിവിടങ്ങളിലാണ് പരിപാടികൾ സംഘടിപ്പിച്ചത്. ദുബായ് പൊലീസിലെ പോസിറ്റീവ് സ്പിരിറ്റ് കൗൺസിൽ, പൊലീസ് സ്റ്റേഷനുകളുടെ പൊതുവകുപ്പിന്റെ സഹകരണത്തോടെയാണ് പരിപാടികൾ നടത്തിയത്. ജബൽ അലി പൊലീസ് സ്റ്റേഷനും വിവിധ സഹകരണ സ്ഥാപനങ്ങളും പരിപാടിയിൽ പങ്കെടുത്തു. ജബൽ അലി വാട്ടർഫ്രണ്ടിലെ അജാദ മേഖലയിലും ദുബായ് ഇൻവെസ്റ്റ്മെന്റ്സ് പാർക്കിലെ എസ്.കെ. തൊഴിലാളി താമസകേന്ദ്രത്തിലുമാണ് തൊഴിലാളികൾക്കായി ബോധവൽക്കരണ പരിപാടികൾ നടത്തിയത്. തൊഴിലാളികൾ താമസിക്കുകയും ജോലി ചെയ്യുകയും ചെയ്യുന്ന ഇടങ്ങളിലേക്ക് നേരിട്ടെത്തി സുരക്ഷാ ബോധവൽക്കരണം നൽകുക, അപകടകരമായ പ്രവൃത്തികൾ തടയുക, സമൂഹത്തിന്റെ സുരക്ഷയും ജീവിതനിലവാരവും മെച്ചപ്പെടുത്തുക എന്നിവയാണ് പരിപാടിയുടെ ലക്ഷ്യം.
ഓൺലൈൻ തട്ടിപ്പിനെതിരെ ബോധവൽക്കരണം
ഒക്ടോബറിലെ സൈബർ സുരക്ഷാ ബോധവൽക്കരണ മാസത്തിന്റെ ഭാഗമായി ഓൺലൈൻ തട്ടിപ്പുകളുടെ സാധാരണ രീതികളും പുതിയ സൈബർ ഭീഷണികളും സംബന്ധിച്ച പ്രത്യേക ക്ലാസുകൾ നടന്നു. വ്യാജ സന്ദേശങ്ങളും സംശയാസ്പദമായ കണ്ണികളും തിരിച്ചറിയുക, വ്യക്തിഗത വിവരങ്ങളും ബാങ്കിങ് വിവരങ്ങളും സംരക്ഷിക്കുക, പാസ്‌വേഡുകളും സ്ഥിരീകരണ കോഡുകളും മറ്റുള്ളവരുമായി പങ്കിടാതിരിക്കുക തുടങ്ങിയ കാര്യങ്ങളിൽ തൊഴിലാളികൾക്ക് നിർദേശങ്ങൾ നൽകി. സൈബർ കുറ്റകൃത്യങ്ങൾ ഔദ്യോഗികമായി അംഗീകരിച്ച മാർഗങ്ങളിലൂടെ റിപ്പോർട്ട് ചെയ്യാനും തൊഴിലാളികളെ പ്രോത്സാഹിപ്പിച്ചു.
കുറ്റകൃത്യങ്ങൾ തടയാനും റോഡ് സുരക്ഷയ്ക്കും നിർദേശങ്ങൾ
കുറ്റകൃത്യങ്ങൾ തടയുന്നതിലും വ്യക്തികളുടെയും സമൂഹത്തിന്റെയും ഉത്തരവാദിത്തത്തിലും പൊലീസുമായി സഹകരിക്കുന്നതിലും സംശയാസ്പദമായതോ അപകടകരമായതോ ആയ പെരുമാറ്റങ്ങൾ റിപ്പോർട്ട് ചെയ്യുന്നതിലും ബോധവൽക്കരണം നൽകി. റോഡ് സുരക്ഷാ ക്ലാസുകളിൽ ഗതാഗത നിയമങ്ങൾ പാലിക്കുക, റോഡ് മുറിച്ചുകടക്കുമ്പോൾ ജാഗ്രത പാലിക്കുക, കാൽനടയാത്രക്കാർക്കും വാഹനയാത്രക്കാർക്കും മറ്റ് റോഡ് ഉപയോക്താക്കൾക്കും അപകടമുണ്ടാക്കുന്ന പ്രവൃത്തികൾ ഒഴിവാക്കുക തുടങ്ങിയ കാര്യങ്ങൾ വിശദീകരിച്ചു. ദുബായ് പൊലീസിന്റെ സ്മാർട്ട് സേവനങ്ങൾ, പൊതുജനങ്ങളുമായുള്ള ആശയവിനിമയ മാർഗങ്ങൾ, പൊലീസ് സേവനങ്ങൾ ലഭിക്കുന്നതിനുള്ള നടപടിക്രമങ്ങൾ എന്നിവയും തൊഴിലാളികൾക്ക് പരിചയപ്പെടുത്തി. ‘അറിവുള്ള വ്യക്തിയാണ് സൈബർ കുറ്റകൃത്യങ്ങൾക്കെതിരായ ആദ്യ പ്രതിരോധം’.
ദുബായ് പൊലീസിലെ പോസിറ്റീവ് സ്പിരിറ്റ് കൗൺസിൽ അധ്യക്ഷ ഫാത്തിമ അഹമ്മദ് ബൊഹ്ജൈർ പറഞ്ഞു, സമൂഹത്തിന്റെ സുരക്ഷ ഉറപ്പാക്കുന്നതിനും കുറ്റകൃത്യങ്ങൾ മുൻകൂട്ടി തടയുന്നതിനുമുള്ള പൊലീസിന്റെ പ്രതിബദ്ധതയാണ് ഇത്തരം പരിപാടികൾ വ്യക്തമാക്കുന്നതെന്ന്. വിവിധ വിഭാഗങ്ങളിലുള്ള ആളുകളിലേക്ക്, പ്രത്യേകിച്ച് തൊഴിലാളികളിലേക്ക് നേരിട്ടെത്തി അവരെ സുരക്ഷാ പ്രവർത്തനങ്ങളിൽ പങ്കാളികളാക്കുന്നത് പ്രധാനമാണെന്നും അവർ പറഞ്ഞു.
സാങ്കേതികവിദ്യ അതിവേഗം വികസിക്കുന്ന സാഹചര്യത്തിൽ ഓൺലൈൻ തട്ടിപ്പുകളുടെ രീതികളും കൂടുതൽ വൈവിധ്യമാകുന്നതിനാൽ സൈബർ സുരക്ഷാ ബോധവൽക്കരണത്തിന് പ്രത്യേക പ്രാധാന്യമുണ്ടെന്നും അവർ വ്യക്തമാക്കി.
സൈബർ ഭീഷണികൾ തിരിച്ചറിയാനും ഉത്തരവാദിത്തത്തോടെ പ്രതികരിക്കാനും സമൂഹത്തിലെ ഓരോ വ്യക്തിയെയും പ്രാപ്തരാക്കുകയാണ് ലക്ഷ്യമെന്നും, അറിവുള്ള വ്യക്തിയാണ് സൈബർ കുറ്റകൃത്യങ്ങൾക്കെതിരായ ആദ്യ പ്രതിരോധമെന്നും ഫാത്തിമ അഹമ്മദ് ബൊഹ്ജൈർ പറഞ്ഞു.
പൊലീസ് സ്റ്റേഷനുകളുടെ പൊതുവകുപ്പും ജബൽ അലി പൊലീസ് സ്റ്റേഷനും മറ്റ് സഹകരണ സ്ഥാപനങ്ങളും നൽകിയ പിന്തുണയെയും അവർ അഭിനന്ദിച്ചു. ഇത്തരം കൂട്ടായ പ്രവർത്തനങ്ങൾ ബോധവൽക്കരണ പരിപാടികൾ കൂടുതൽ ആളുകളിലേക്ക് എത്തിക്കാനും സമൂഹത്തിൽ ദീർഘകാല സുരക്ഷാ ബോധം വളർത്താനും സഹായിക്കുമെന്നും അവർ പറഞ്ഞു.
About The Author
