ദുബായിൽ നിന്ന് ഇത്തിഹാദ് റെയിൽ യാത്ര തുടങ്ങി; ആദ്യ ട്രെയിൻ അബുദാബിയിലെത്തി

ദുബായ്, സെപ്റ്റംബർ 30, 2026 : ദുബായിൽ നിന്നുള്ള ഇത്തിഹാദ് റെയിൽ യാത്രാ സർവീസിന് തുടക്കമായി. അൽ യലായീസ് സ്റ്റേഷനിൽ നിന്ന് അബുദാബിയിലേക്കുള്ള ആദ്യ യാത്രാ ട്രെയിൻ ബുധനാഴ്ച രാവിലെ 6.18ന് പുറപ്പെട്ട് 7.30ന് അബുദാബിയിലെത്തി.

ദുബായ്–അബുദാബി യാത്ര ഇനി ട്രെയിനിലും

ദുബായിലെ അൽ യലായീസ് സ്റ്റേഷൻ പ്രവർത്തനം ആരംഭിച്ചതോടെ അബുദാബി, ദുബായ്, ഫുജൈറ എന്നിവിടങ്ങൾ ഇത്തിഹാദ് റെയിൽ യാത്രാ ശൃംഖലയിലൂടെ നേരിട്ട് ബന്ധിപ്പിക്കപ്പെട്ടു.

ദുബായിൽ നിന്ന് അബുദാബിയിലേക്ക് പ്രതിദിനം അഞ്ച് സർവീസുകളും തിരിച്ചും അഞ്ച് സർവീസുകളുമാണ് ക്രമീകരിച്ചിരിക്കുന്നത്. ഏകദേശം ഒരു മണിക്കൂർ നാല് മിനിറ്റാണ് യാത്രാസമയം.

ടിക്കറ്റ് നിരക്ക് 39 ദിർഹം മുതൽ

ദുബായിൽ നിന്ന് അബുദാബിയിലേക്കുള്ള കംഫർട്ട് ക്ലാസ് ടിക്കറ്റുകൾ 39 ദിർഹം മുതലും പ്രീമിയം ക്ലാസ് ടിക്കറ്റുകൾ 109 ദിർഹം മുതലുമാണ് ലഭിക്കുന്നത്.

ദുബായ്–ഫുജൈറ നേരിട്ടുള്ള യാത്രയ്ക്ക് ഏകദേശം ഒരു മണിക്കൂർ 10 മിനിറ്റാണ് വേണ്ടത്. കംഫർട്ട് ക്ലാസ് നിരക്ക് 29 ദിർഹം മുതലാണ്. യാത്രാ തീയതിയും ടിക്കറ്റ് വിഭാഗവും അനുസരിച്ച് നിരക്കുകളിൽ മാറ്റമുണ്ടാകാം.

മെട്രോയിലേക്കും എളുപ്പത്തിൽ എത്താം

ജുമൈറ ഗോൾഫ് എസ്റ്റേറ്റ്സിലാണ് ദുബായിലെ അൽ യലായീസ് സ്റ്റേഷൻ. ജുമൈറ ഗോൾഫ് എസ്റ്റേറ്റ്സ് മെട്രോ സ്റ്റേഷനുമായി കാൽനടപ്പാലം വഴി റെയിൽ സ്റ്റേഷനെ ബന്ധിപ്പിച്ചിട്ടുണ്ട്. ഇതിലൂടെ ഇത്തിഹാദ് റെയിൽ യാത്രക്കാർക്ക് ദുബായ് മെട്രോയിലേക്കും എളുപ്പത്തിൽ മാറാം.

ഇത്തിഹാദ് റെയിൽ വെബ്‌സൈറ്റ്, മൊബൈൽ ആപ്പ്, സ്റ്റേഷനുകളിലെ ടിക്കറ്റ് മെഷീനുകൾ എന്നിവ വഴി യാത്രക്കാർക്ക് ടിക്കറ്റ് എടുക്കാം.

അൽ ദൈദിൽ നിന്നും സർവീസ് ആരംഭിച്ചു

ഷാർജയിലെ അൽ ദൈദ് സ്റ്റേഷനും യാത്രക്കാർക്കായി തുറന്നു. അൽ ദൈദിൽ നിന്ന് ഫുജൈറയിലേക്ക് 25 മിനിറ്റിലും അബുദാബിയിലേക്ക് ഏകദേശം ഒരു മണിക്കൂർ 24 മിനിറ്റിലും എത്താം. ഫുജൈറയിലേക്കുള്ള ടിക്കറ്റ് നിരക്ക് 19 ദിർഹം മുതലാണ്.

യുഎഇയിലെ വിവിധ എമിറേറ്റുകളെ ബന്ധിപ്പിക്കുന്ന ദേശീയ യാത്രാ റെയിൽ ശൃംഖലയുടെ വികസനത്തിലെ പ്രധാന ഘട്ടമാണ് ദുബായ്, അൽ ദൈദ് സ്റ്റേഷനുകളുടെ പ്രവർത്തനാരംഭം.