ശനിഗ്രഹത്തെ അടുത്തുകാണാൻ അവസരം; ഒക്ടോബർ 4ന് മലീഹ നാഷണൽ പാർക്കിൽ പ്രത്യേക വാനനിരീക്ഷണ പരിപാടി

ഷാർജ, ഒക്ടോബർ 4, 2026 : ഈ വർഷം ശനിഗ്രഹത്തെ ഏറ്റവും വ്യക്തമായി നിരീക്ഷിക്കാൻ കഴിയുന്ന അവസരങ്ങളിലൊന്നിന് വേദിയൊരുക്കി ഷാർജയിലെ മലീഹ നാഷണൽ പാർക്ക്. ഒക്ടോബർ 4ന് നടക്കുന്ന ‘സാറ്റേൺ ഒപ്പോസിഷൻ’ (Saturn Opposition) പ്രതിഭാസത്തോടനുബന്ധിച്ചാണ് ജ്യോതിശാസ്ത്ര പ്രേമികൾക്കും കുടുംബങ്ങൾക്കും പൊതുജനങ്ങൾക്കുമായി പ്രത്യേക വാനനിരീക്ഷണ പരിപാടി സംഘടിപ്പിക്കുന്നത്.

മലീഹ ഐയിൽ (Mleiha Eye) നടക്കുന്ന അഞ്ച് മണിക്കൂർ നീളുന്ന പരിപാടിയിൽ ടെലിസ്കോപ്പിലൂടെ ശനിഗ്രഹത്തെ നിരീക്ഷിക്കുന്നതിനൊപ്പം ജ്യോതിശാസ്ത്രത്തെക്കുറിച്ച് കൂടുതൽ അറിയാനും അവസരമുണ്ടാകും.

എന്താണ് സാറ്റേൺ ഒപ്പോസിഷൻ?

സൂര്യനും ശനിഗ്രഹത്തിനും ഇടയിൽ ഭൂമി എത്തുന്ന പ്രതിഭാസമാണ് സാറ്റേൺ ഒപ്പോസിഷൻ. ഈ സമയത്ത് ഭൂമിയിൽ നിന്ന് നോക്കുമ്പോൾ ശനിഗ്രഹം സൂര്യന്റെ നേരെ എതിർദിശയിൽ ദൃശ്യമാകും. സാധാരണയേക്കാൾ കൂടുതൽ തിളക്കത്തോടെയും വ്യക്തതയോടെയും രാത്രിയാകാശത്തിൽ ശനിയെ കാണാൻ കഴിയുന്ന അവസരമാണിത്.

വർഷത്തിലൊരിക്കൽ സംഭവിക്കുന്ന ഈ പ്രതിഭാസം ശനിഗ്രഹത്തെയും അതിന്റെ പ്രത്യേകതയായ വളയങ്ങളെയും ഉപഗ്രഹങ്ങളെയും ടെലിസ്കോപ്പിലൂടെ നിരീക്ഷിക്കാൻ അനുയോജ്യമായ സമയമാണ്.

ടെലിസ്കോപ്പിലൂടെ ശനിയുടെ വളയങ്ങളും കാണാം

മലീഹയുടെ മരുഭൂമിയിലെ രാത്രിയാകാശമാണ് പരിപാടിയുടെ പ്രധാന ആകർഷണം. വിദഗ്ധരുടെ മാർഗനിർദേശത്തോടെ ടെലിസ്കോപ്പിലൂടെ ശനിഗ്രഹത്തെ അടുത്തറിയാനും ഗ്രഹങ്ങളുടെ ചലനങ്ങളെക്കുറിച്ചും ആകാശ പ്രതിഭാസങ്ങളെക്കുറിച്ചും മനസ്സിലാക്കാനും സന്ദർശകർക്ക് അവസരമൊരുക്കും.

ജ്യോതിശാസ്ത്ര പഠനത്തിനും അവസരം

വാനനിരീക്ഷണത്തിനപ്പുറം ജ്യോതിശാസ്ത്രം, ഗ്രഹങ്ങളെക്കുറിച്ചുള്ള ശാസ്ത്രീയ പഠനം, പ്രകാശമലിനീകരണം കുറഞ്ഞ ആകാശത്തിന്റെ പ്രാധാന്യം എന്നിവയെക്കുറിച്ച് പൊതുജനങ്ങളിൽ അവബോധം വളർത്തുകയെന്നതും പരിപാടിയുടെ ലക്ഷ്യമാണ്.

എല്ലാ പ്രായക്കാർക്കും ആസ്വദിക്കാവുന്ന രീതിയിൽ ശാസ്ത്രീയ വിശദീകരണങ്ങളും നേരിട്ടുള്ള വാനനിരീക്ഷണവും ഉൾപ്പെടുത്തിയാണ് അഞ്ച് മണിക്കൂർ നീളുന്ന അനുഭവം ഒരുക്കുന്നതെന്ന് മലീഹ നാഷണൽ പാർക്ക് അറിയിച്ചു.

About The Author

web admin

See author's posts