സമ്മാനങ്ങളും ഓഫറുകളും ആഘോഷങ്ങളും; ദുബായ് സമ്മർ സർപ്രൈസസിന് സമാപനം

ദുബായ്,സെപ്റ്റംബർ 16,2026 : ഷോപ്പിങ്, വിനോദം, കുടുംബ പരിപാടികൾ തുടങ്ങിയവക്ക് വേദിയായ ദുബായ് സമ്മർ സർപ്രൈസസ് 2026 ന് സമാപനം. ഇത്തവണത്തെ വിവിധ ഓഫറുകളും പ്രമോഷൻ ക്യാംപെയ്‌നുകളും ശരാശരി ഉപഭോക്തൃ ചെലവിൽ 110 ശതമാനം വർധന രേഖപ്പെടുത്തിയതായി സംഘാടകർ അറിയിച്ചു. ദുബായ് ഫെസ്റ്റിവൽസ് ആൻഡ് റീട്ടെയിൽ എസ്റ്റാബ്ലിഷ്‌മെന്റ് (DFRE) സംഘടിപ്പിച്ച 29-ാമത് പതിപ്പിൽ 1,000ലധികം ബ്രാൻഡുകളും 4,000 റീട്ടെയിൽ ഔട്ട്‌ലെറ്റുകളും പങ്കെടുത്തു. 90 ശതമാനം വരെ വിലക്കുറവുള്ള ഗ്രേറ്റ് ദുബായ് സമ്മർ സെയിലും ബാക്ക് ടു സ്കൂൾ ക്യാംപെയ്‌നും ഇത്തവണത്തെ പ്രധാന ആകർഷണങ്ങളായിരുന്നു.

സമ്മർ സർപ്രൈസസിന്റെ ഭാഗമായി നടത്തിയ നറുക്കെടുപ്പുകളിലും സമ്മാന പദ്ധതികളിലും 705 പേർക്ക് 1.6 കോടി ദിർഹത്തിലേറെ മൂല്യമുള്ള സമ്മാനങ്ങൾ ലഭിച്ചു. കാറുകൾ, സ്വർണം, ആഭരണങ്ങൾ, പണം, ഇലക്ട്രോണിക് ഉപകരണങ്ങൾ, സ്കോളർഷിപ്പുകൾ, ലോയൽറ്റി പോയിന്റുകൾ എന്നിവ സമ്മാനങ്ങളിൽ ഉൾപ്പെട്ടു. ആദ്യമായി സംഘടിപ്പിച്ച ‘വിൻ യുവർ ഹോം ഇൻ ദുബായ് ’ പദ്ധതിയും ശ്രദ്ധ നേടി. 1.2 ലക്ഷത്തിലധികം ഷോപ്പർമാർ പങ്കെടുത്ത പദ്ധതിയിൽ 12 അപ്പാർട്ട്മെന്റുകൾ സമ്മാനമായി നൽകി. പദ്ധതിയിൽ പങ്കെടുത്ത ഇടപാടുകളുടെ മൂല്യം 25 കോടി ദിർഹത്തിലധികം ആയിരുന്നു.

വിനോദ പരിപാടികളുടെ ഭാഗമായി 56 പരിപാടികളും 20 സഞ്ചരിക്കുന്ന കലാപരിപാടികളും നടന്നു. റഹ്മ റിയാദ്, നസീഫ് സെയ്തൂൺ, കെയ്‌റോക്കി, ഡിസ്റ്റിങ്ക്റ്റ്, അൽ ഷാമി തുടങ്ങിയ പ്രാദേശിക കലാകാരന്മാരുടെ സംഗീത പരിപാടികളും അരങ്ങേറി. ഭക്ഷണപ്രേമികൾക്കായി സമ്മർ റസ്റ്ററന്റ് വീക്കും 10 ദിർഹം ഡിഷ് പദ്ധതിയും ഒരുക്കി. നൂറുകണക്കിന് റസ്റ്ററന്റുകളും ബ്രാൻഡുകളും ഇതിൽ പങ്കെടുത്തു. കുടുംബ വിനോദ പരിപാടികളിലും വലിയ പങ്കാളിത്തമാണ് ഉണ്ടായത്. മോദേഷ് വേൾഡ് 59,244 സന്ദർശകരെ സ്വീകരിച്ചു. ഹോട്ടലുകൾ, വിനോദസഞ്ചാര കേന്ദ്രങ്ങൾ, സ്പാകൾ, സമ്മർ ക്യാംപുകൾ എന്നിവയിലെ പ്രത്യേക ഓഫറുകളും ഫെസ്റ്റിവലിന്റെ ഭാഗമായി ലഭ്യമായി. ദുബായ് മാളത്തോൺ ഓട്ടമത്സരങ്ങളും ഫിഫ ലോകകപ്പ് പ്രമേയമാക്കിയ പരിപാടികളും നഗരത്തിന്റെ വിവിധ ഭാഗങ്ങളിലേക്ക് സമ്മർ സർപ്രൈസസിന്റെ ആവേശം വ്യാപിപ്പിച്ചു.

About The Author

web admin

See author's posts