ദുബായ്,ഒക്ടോബർ 14,2026 : പ്രീപ്രൈമറി വിദ്യാഭ്യാസത്തിൽ കുട്ടികളുടെ പങ്കാളിത്തത്തിൽ ഗൾഫ് സഹകരണ കൗൺസിൽ (ജിസിസി) രാജ്യങ്ങളിൽ യുഎഇ ഒന്നാമത്. ആഗോള കൺസൾട്ടിങ് സ്ഥാപനമായ ആർതർ ഡി. ലിറ്റിൽ പുറത്തുവിട്ട പുതിയ പഠനപ്രകാരം യുഎഇയിലെ പ്രീപ്രൈമറി പ്രവേശന നിരക്ക് ഏകദേശം 82 ശതമാനമാണ്. ജിസിസി രാജ്യങ്ങളിൽ പ്രീപ്രൈമറി വിദ്യാഭ്യാസം എല്ലാ കുട്ടികളിലേക്കും എത്തിക്കുക എന്ന ലക്ഷ്യത്തോട് ഏറ്റവും അടുത്തുനിൽക്കുന്നതും യുഎഇയാണ്.
യുഎഇയിൽ കിന്റർഗാർട്ടൻ വിദ്യാഭ്യാസത്തിൽ കുട്ടികളുടെ പങ്കാളിത്തം ഇതിനകം ഉയർന്ന നിലയിലാണ്. അതിനാൽ ഇനി കൂടുതൽ ശ്രദ്ധ നൽകേണ്ടത് കിന്റർഗാർട്ടന് മുമ്പുള്ള നഴ്സറി വിദ്യാഭ്യാസം വിപുലീകരിക്കുന്നതിനാണെന്ന് റിപ്പോർട്ട് ചൂണ്ടിക്കാട്ടുന്നു.
ജിസിസി രാജ്യങ്ങളിലാകെ മൂന്ന് മുതൽ അഞ്ച് വയസ്സ് വരെ പ്രായമുള്ള ഏകദേശം 26 ലക്ഷം കുട്ടികളുണ്ട്. 2035ഓടെ പ്രീപ്രൈമറി പ്രവേശന നിരക്ക് 95 ശതമാനത്തിലെത്തിക്കണമെങ്കിൽ ഏകദേശം 11,600 പുതിയ കിന്റർഗാർട്ടനുകളും 1,16,000 അധിക അധ്യാപകരും ആവശ്യമായി വരുമെന്നാണ് കണക്കുകൂട്ടൽ. ഇതിൽ ശ്രദ്ധേയമായ കാര്യം, പുതിയ കിന്റർഗാർട്ടനുകളുടെ ആവശ്യകതയിൽ ഏകദേശം 94 ശതമാനവും നിലവിലുള്ള വിദ്യാഭ്യാസ സൗകര്യങ്ങളുടെ കുറവ് പരിഹരിക്കുന്നതിനാണ്. ഭാവിയിൽ കുട്ടികളുടെ എണ്ണം വർധിക്കുന്നതുകൊണ്ട് മാത്രമല്ല ഈ ആവശ്യം ഉണ്ടാകുന്നത്. ആവശ്യമായ കിന്റർഗാർട്ടൻ വികസനത്തിന്റെ ഏകദേശം നാലിൽ മൂന്ന് ഭാഗവും സൗദി അറേബ്യയിലായിരിക്കുമെന്നും പഠനം വ്യക്തമാക്കുന്നു. നഴ്സറി വിദ്യാഭ്യാസവും ഉൾപ്പെടുത്തി, നിലവിൽ വേണ്ടത്ര സേവനം ലഭിക്കാത്ത കുട്ടികളിൽ 40 ശതമാനം പേർക്ക് ഔപചാരിക വിദ്യാഭ്യാസ സൗകര്യം ഒരുക്കുന്ന സാഹചര്യം പരിഗണിച്ചാൽ, ജിസിസിയിൽ ഏകദേശം 40,000 നഴ്സറികളും കിന്റർഗാർട്ടനുകളും 2,24,000 അധ്യാപകരും ആവശ്യമായി വരും. ബാല്യകാല വിദ്യാഭ്യാസത്തിലെ നിക്ഷേപം സാമ്പത്തിക വളർച്ചയ്ക്കും ഗുണകരമാണെന്നാണ് റിപ്പോർട്ടിന്റെ മറ്റൊരു പ്രധാന കണ്ടെത്തൽ. ജനനം മുതൽ അഞ്ച് വയസ്സ് വരെയുള്ള കുട്ടികൾക്ക് നൽകുന്ന ഉയർന്ന നിലവാരമുള്ള സമഗ്ര വിദ്യാഭ്യാസ പരിപാടികളിൽ നിക്ഷേപിക്കുന്ന ഓരോ ഡോളറിനും ഏകദേശം ആറ് ഡോളറിന്റെ നേട്ടം ലഭിക്കാമെന്ന് റിപ്പോർട്ടിൽ ഉദ്ധരിച്ച ഗവേഷണങ്ങൾ വ്യക്തമാക്കുന്നു. ഒരു കുട്ടിക്ക് പ്രതിവർഷം ഏകദേശം 13 ശതമാനം വരുമാനനേട്ടത്തിന് തുല്യമായ സാമ്പത്തിക ഗുണഫലമാണ് പഠനം ചൂണ്ടിക്കാട്ടുന്നത്.
കുട്ടികളുടെ ഭാവിയിലെ കഴിവുകൾ വികസിപ്പിക്കുന്നതിനൊപ്പം കൂടുതൽ മാതാപിതാക്കൾക്ക്, പ്രത്യേകിച്ച് സ്ത്രീകൾക്ക്, തൊഴിൽ രംഗത്തേക്ക് പ്രവേശിക്കാനും ജോലിയിൽ തുടരാനും മികച്ച ശിശുപരിചരണ സൗകര്യങ്ങൾ സഹായിക്കും. ഇതിനെ ഇരട്ട നേട്ടമായാണ് റിപ്പോർട്ട് വിശേഷിപ്പിക്കുന്നത്. ബാല്യകാല വിദ്യാഭ്യാസത്തിൽ യുഎഇ ഇതിനകം ശക്തമായ മുന്നേറ്റം നടത്തിയിട്ടുണ്ടെന്നും ഇനി വിദ്യാഭ്യാസത്തിന്റെ ഗുണനിലവാരം മെച്ചപ്പെടുത്തുന്നതിനും കുട്ടികളുടെ ആദ്യകാല വളർച്ചയ്ക്ക് കൂടുതൽ സൗകര്യങ്ങൾ ഒരുക്കുന്നതിനുമാണ് പ്രാധാന്യം നൽകേണ്ടതെന്നും ആർതർ ഡി. ലിറ്റിൽ പ്രിൻസിപ്പൽ അമർ കാസിമി പറഞ്ഞു. ഇത്തരം നിക്ഷേപങ്ങൾ യുഎഇയുടെ ദീർഘകാല സാമ്പത്തിക വളർച്ചയ്ക്കും മനുഷ്യവിഭവശേഷി വികസനത്തിനും സഹായിക്കുമെന്നും അദ്ദേഹം വ്യക്തമാക്കി. ബാല്യകാല വിദ്യാഭ്യാസത്തെ ഒരു സാമൂഹിക ചെലവായി മാത്രം കാണരുതെന്നും സാമ്പത്തിക വികസനത്തിനുള്ള പ്രധാന നിക്ഷേപമായി പരിഗണിക്കണമെന്നും സ്ഥാപനത്തിന്റെ പാർട്ണറായ യിഗിത് സാഫ് അഭിപ്രായപ്പെട്ടു. ഇത് ഭാവിയിലെ തൊഴിലാളികളുടെ കഴിവുകൾ മെച്ചപ്പെടുത്തുന്നതിനൊപ്പം സ്ത്രീകളുടെ തൊഴിൽ പങ്കാളിത്തവും സ്വദേശിവൽക്കരണ ലക്ഷ്യങ്ങളും ശക്തിപ്പെടുത്താൻ സഹായിക്കുമെന്നും അദ്ദേഹം ചൂണ്ടിക്കാട്ടി. അതേസമയം, അധ്യാപകരുടെ കുറവ്, വിദ്യാഭ്യാസത്തിന്റെ ഗുണനിലവാരവും നിയന്ത്രണ സംവിധാനങ്ങളും, മാതാപിതാക്കളുടെ പങ്കാളിത്തക്കുറവ് എന്നിവയാണ് ഈ മേഖല നേരിടുന്ന മൂന്ന് പ്രധാന വെല്ലുവിളികളെന്ന് റിപ്പോർട്ട് വ്യക്തമാക്കുന്നു. ഇവ പരിഹരിക്കുന്നതിനായി വിദ്യാഭ്യാസം, ആരോഗ്യം, തൊഴിൽ മേഖലകൾ തമ്മിലുള്ള ഏകോപനം ശക്തിപ്പെടുത്തുക, അധ്യാപകരുടെ പരിശീലനത്തിലും ഗുണനിലവാരത്തിലും കൂടുതൽ നിക്ഷേപിക്കുക, മാതാപിതാക്കളുടെ പങ്കാളിത്തം വർധിപ്പിക്കുക, കൃത്യമായ മേൽനോട്ടത്തോടെ എഐ അധിഷ്ഠിത പഠനസഹായ സംവിധാനങ്ങൾ ഉപയോഗിക്കുക തുടങ്ങിയ നിർദേശങ്ങളും റിപ്പോർട്ട് മുന്നോട്ടുവെക്കുന്നു.
കുട്ടികളുടെ വിദ്യാഭ്യാസത്തിൽ ഇന്ന് നടത്തുന്ന നിക്ഷേപം നാളത്തെ തലമുറയുടെ വളർച്ചയ്ക്കൊപ്പം രാജ്യത്തിന്റെ സാമ്പത്തിക ഭാവിക്കും കരുത്താകുമെന്നാണ് പഠനം നൽകുന്ന സന്ദേശം.
About The Author
