ദുബായ്,സെപ്റ്റംബർ 9, 2026 : അടിയന്തര സാഹചര്യങ്ങളിൽ സഹായം തേടുമ്പോൾ ഓരോ സെക്കൻഡിനും വിലയുണ്ടെന്ന സന്ദേശവുമായി യുഎഇ ആഭ്യന്തര മന്ത്രാലയം. ‘ഓരോ സെക്കൻഡും വിലപ്പെട്ടതാണ്’ എന്ന പ്രമേയത്തിൽ സെപ്റ്റംബർ 9ന് ‘യു എ ഇ എമെർജൻസി നമ്പർ ഡേ ‘ആചരിക്കുന്നതിന്റെ ഭാഗമായി രാജ്യവ്യാപക ബോധവൽക്കരണ ക്യാംപയിൻ ആരംഭിച്ചു.ദുബായ് പൊലീസിന്റെ ആസ്ഥാനവും യുഎഇയിലെ വിവിധ പൊലീസ് ആസ്ഥാനങ്ങളും സഹകരിച്ചാണ് ക്യാംപയിൻ നടത്തുന്നത്. അടിയന്തര സാഹചര്യങ്ങളിൽ ‘999’ എന്ന നമ്പർ മാത്രമാണ് ഉപയോഗിക്കേണ്ടതെന്നും പൊലീസ് സേവനങ്ങളുമായി ബന്ധപ്പെട്ട പൊതുവായ അന്വേഷണങ്ങൾക്കും അടിയന്തരമല്ലാത്ത സേവനങ്ങൾക്കും ‘901’ ഉപയോഗിക്കണമെന്നും അധികൃതർ ഓർമിപ്പിച്ചു.അടിയന്തരമല്ലാത്ത ആവശ്യങ്ങൾക്കായി 999ലേക്ക് വിളിക്കുന്നത് ഒഴിവാക്കണം. ഇതുവഴി യഥാർഥ അടിയന്തര സാഹചര്യങ്ങളിലുള്ളവർക്ക് പൊലീസ് സഹായം വേഗത്തിൽ ലഭ്യമാക്കാൻ കഴിയുമെന്ന് അധികൃതർ വ്യക്തമാക്കി.
അപകടമോ മറ്റ് അടിയന്തര സാഹചര്യമോ റിപ്പോർട്ട് ചെയ്യുമ്പോൾ സ്ഥലം കൃത്യമായി പറയുക എന്നതാണ് പ്രധാന നിർദേശം. സംഭവിച്ചത് എന്താണെന്ന് വ്യക്തമായി വിശദീകരിക്കുകയും കോൾ സ്വീകരിക്കുന്ന ഉദ്യോഗസ്ഥന്റെ ചോദ്യങ്ങൾക്ക് കൃത്യമായ മറുപടി നൽകുകയും വേണം.ലഭിക്കുന്ന വിവരങ്ങളുടെ അടിസ്ഥാനത്തിലാണ് പൊലീസ് ഓപ്പറേഷൻസ് റൂം സാഹചര്യം വിലയിരുത്തുന്നതും ആവശ്യമായ പ്രത്യേക സംഘത്തെയും മറ്റ് സംവിധാനങ്ങളെയും സംഭവസ്ഥലത്തേക്ക് അയയ്ക്കുന്നതും. 999 ലേക്കുള്ള അനാവശ്യ കോളുകൾ കുറയ്ക്കുക, പരാതികളുടെയും റിപ്പോർട്ടുകളുടെയും ഗുണനിലവാരം മെച്ചപ്പെടുത്തുക, അടിയന്തര സഹായം തേടേണ്ട ശരിയായ മാർഗത്തെക്കുറിച്ച് ജനങ്ങളെ ബോധവൽക്കരിക്കുക എന്നിവയാണ് ക്യാംപയിന്റെ പ്രധാന ലക്ഷ്യങ്ങൾ. വിവിധ ഭാഷകളിലാണ് ബോധവൽക്കരണ സന്ദേശങ്ങൾ നൽകുന്നത്.
അടിയന്തര സാഹചര്യങ്ങളിൽ സമയത്തിന്റെ പ്രാധാന്യം വ്യക്തമാക്കുന്നതാണ് ‘ഓരോ സെക്കൻഡും വിലപ്പെട്ടതാണ്’ എന്ന പ്രമേയമെന്ന് ആഭ്യന്തര മന്ത്രാലയത്തിലെ സെൻട്രൽ ഓപ്പറേഷൻസ് ഡയറക്ടർ ബ്രിഗേഡിയർ ജനറൽ അബ്ദുൽ അസീസ് അൽ അഹ്മദ് പറഞ്ഞു. കൃത്യമായ ലൊക്കേഷൻ, സംഭവത്തിന്റെ വ്യക്തമായ വിശദീകരണം എന്നിവ നൽകുന്നത് വേഗത്തിലുള്ള പൊലീസ് പ്രതികരണത്തിന് സഹായിക്കുമെന്ന് ദുബായ് പൊലീസിലെ ജനറൽ ഡിപ്പാർട്ട്മെന്റ് ഓഫ് ഓപ്പറേഷൻസ് ഡയറക്ടർ ബ്രിഗേഡിയർ തുർക്കി അബ്ദുൽറഹ്മാൻ ബിൻ ഫാരിസ് പറഞ്ഞു.
പൊതുവായ അന്വേഷണം, അടിയന്തരമല്ലാത്ത പൊലീസ് സേവനങ്ങൾ – 901, ഓരോ ആവശ്യത്തിനും ശരിയായ നമ്പർ ഉപയോഗിക്കുന്നത് അടിയന്തര സേവനങ്ങൾ തടസ്സമില്ലാതെ ലഭ്യമാക്കാൻ സഹായിക്കുമെന്ന് പൊലീസ് വ്യക്തമാക്കി.
About The Author
The installation process was a breeze and the app runs perfectly on my phone without any lag. Definitely the best way to get the game via wa777gamedownloadapk.