ഷാർജ, ഒക്ടോബർ 13, 2026 : 22-ാമത് അന്താരാഷ്ട്ര വിദ്യാഭ്യാസ പ്രദർശനത്തിന് തിങ്കളാഴ്ച രാവിലെ ഷാർജയിൽ തുടക്കമായി. ഷാർജ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രിയുടെ പിന്തുണയോടെ എക്‌സ്‌പോ സെന്റർ ഷാർജയാണ് പ്രദർശനം സംഘടിപ്പിക്കുന്നത്.
യുഎഇയിൽ നിന്നും വിദേശ രാജ്യങ്ങളിൽ നിന്നുമുള്ള 60ലേറെ സർവകലാശാലകളും വിദ്യാഭ്യാസ സ്ഥാപനങ്ങളും വിവിധ സർക്കാർ സ്ഥാപനങ്ങളും പ്രദർശനത്തിൽ പങ്കെടുക്കുന്നുണ്ട്.
ഉന്നതപഠനത്തിന് തയ്യാറെടുക്കുന്ന വിദ്യാർഥികൾക്ക് വിവിധ സർവകലാശാലകളിലെ പഠനാവസരങ്ങളെക്കുറിച്ച് നേരിട്ട് മനസ്സിലാക്കാനുള്ള മികച്ച വേദിയാണ് പ്രദർശനമെന്ന് എക്‌സ്‌പോ സെന്റർ ഷാർജ സിഇഒ സെയ്ഫ് അൽ മിദ്ഫ പറഞ്ഞു.
ഹയർ സെക്കൻഡറി പഠനം പൂർത്തിയാക്കുന്നവർക്കും ബിരുദാനന്തര ബിരുദ പഠനം ആഗ്രഹിക്കുന്നവർക്കും അനുയോജ്യമായ കോഴ്സുകൾ കണ്ടെത്താൻ പ്രദർശനം സഹായിക്കും. ഭാവിയിലെ തൊഴിൽ വിപണിയുടെ ആവശ്യങ്ങൾക്കനുസരിച്ച് രൂപകൽപ്പന ചെയ്ത പുതിയ കോഴ്സുകളും വിവിധ മേഖലകളിലെ പഠനാവസരങ്ങളും ഇവിടെ പരിചയപ്പെടാം.
പങ്കെടുക്കുന്ന സർവകലാശാലകൾ നൽകുന്ന സ്കോളർഷിപ്പുകൾ, പുതിയ പഠനമേഖലകൾ, നൂതന വിദ്യാഭ്യാസ കോഴ്സുകൾ എന്നിവയെക്കുറിച്ചും വിദ്യാർഥികൾക്ക് വിവരങ്ങൾ ലഭിക്കും.
സർവകലാശാലകളിൽ പ്രവേശനം നേടുന്നതിന് മുമ്പ് വിവിധ പഠനാവസരങ്ങൾ താരതമ്യം ചെയ്യാനും ശരിയായ തീരുമാനമെടുക്കാനും പ്രദർശനം പ്രയോജനപ്പെടുത്തണമെന്ന് സെയ്ഫ് അൽ മിദ്ഫ വിദ്യാർഥികളോടും രക്ഷിതാക്കളോടും അഭ്യർഥിച്ചു.
ഉന്നതവിദ്യാഭ്യാസവുമായി ബന്ധപ്പെട്ട സംശയങ്ങൾക്ക് വ്യക്തത നേടാനും ഭാവിയിലെ തൊഴിൽസാധ്യതകൾ പരിഗണിച്ച് അനുയോജ്യമായ കോഴ്സുകൾ തിരഞ്ഞെടുക്കാനും പ്രദർശനം അവസരമൊരുക്കുന്നു.
About The Author
