50 വർഷത്തിലേറെ പഴക്കമുള്ള പ്രശസ്ത്രമായ ടൊയോട്ട കെട്ടിടം പൊളിക്കാനൊരുങ്ങി ദുബായ്

ദുബായ് ,ഓഗസ്റ്റ് 21 2026 : ഷെയ്ഖ് സായിദ് റോഡിലെ ദുബായിയുടെ ഏറ്റവും പ്രശസ്തമായ അടയാളങ്ങളിലൊന്നായ ‘ടൊയോട്ട ബിൽഡിംഗ്’ പൊളിച്ചുനീക്കാനുള്ള ഒരുക്കങ്ങൾ നടക്കുന്നതോടെ, അഞ്ച് പതിറ്റാണ്ടിലേറെ നീണ്ട അതിന്റെ ചരിത്രമാണ് അവസാനിക്കുന്നത് .
1974-ൽ പൂർത്തിയായ 15 നിലകളുള്ള ഈ കെട്ടിടം, ഷെയ്ഖ് സായിദ് റോഡിലെ വികസന നാളുകൾക്ക് സാക്ഷ്യം വഹിച്ചുകൊണ്ട്, ദുബായ് അതിവേഗം വളരുന്ന ഒരു നഗരത്തിൽ നിന്ന് ആഗോളതലത്തിൽ ശ്രദ്ധേയമായ ഒരു മഹാനഗരമായി മാറിയ മാറ്റത്തിന് സാക്ഷിയായി നിലകൊണ്ടു. 2027-ൽ കെട്ടിടം പൊളിക്കാനാണ് നിലവിലെ പദ്ധതി.
നിലവിൽ കെട്ടിടത്തിലെ താമസക്കാരെ ഒഴിപ്പിക്കുന്ന നടപടികളാണ് നടക്കുന്നത്.
കെട്ടിടത്തിന്റെ നിലവിലെ അവസ്ഥ കാരണം, അറ്റകുറ്റപ്പണികൾക്കും പുനരുദ്ധാരണത്തിനുമുള്ള നിർദ്ദേശങ്ങൾക്ക് ദുബായ് മുനിസിപ്പാലിറ്റി അനുമതി നൽകാതിരുന്നതിനെത്തുടർന്നാണ് കെട്ടിടം പൊളിക്കാൻ തീരുമാനിച്ചതെന്ന് അധികൃതർ അറിയിച്ചു.
കെട്ടിടത്തിലെ ഉയർന്ന ജനസാന്ദ്രതയും ഈ തീരുമാനത്തിന് കാരണമായ ഘടകങ്ങളിലൊന്നായി മാനേജ്‌മെന്റ് ചൂണ്ടിക്കാട്ടി.
തലമുറകൾ തിരിച്ചറിഞ്ഞ ഒരു അടയാളമാണ് ,’ടൊയോട്ട ബിൽഡിംഗ്’ എന്നത്. ഇത് കെട്ടിടത്തിന്റെ നാമമായിരുന്നില്ലെങ്കിലും, 1981-ൽ കെട്ടിടത്തിന്റെ മുകളിൽ ടൊയോട്ടയുടെ വലിയൊരു പരസ്യം സ്ഥാപിച്ചതോടെയാണ് ഈ പേരിൽ അറിയപ്പെടാൻ തുടങ്ങിയത്.
ഗൂഗിൾ മാപ്പും നാവിഗേഷൻ ആപ്പുകളും വ്യാപകമാകുന്നതിന് മുമ്പ് ദുബായിൽ ഒരു സ്ഥലം മറ്റൊരാൾക്ക് പറഞ്ഞുകൊടുക്കാനുള്ള പ്രധാന ലാൻഡ്മാർക്കുകളിൽ ഒന്നായിരുന്നു ഈ കെട്ടിടം.
ഷെയ്ഖ് സായിദ് റോഡ് എമിറേറ്റിലെ ഏറ്റവും പ്രധാനപ്പെട്ട വാണിജ്യ-താമസ മേഖലകളിലൊന്നായി വികസിച്ചപ്പോഴും ഈ കെട്ടിടം ആ വഴിയിലെ ഒരു സവിശേഷ അടയാളമായി നിലകൊണ്ടു.
അവസാന അപ്പാർട്ട്മെന്റുകളും ഒഴിഞ്ഞുകഴിയുകയും പൊളിക്കാനുള്ള ഒരുക്കങ്ങൾ പുരോഗമിക്കുകയും ചെയ്യുമ്പോൾ, ‘ടൊയോട്ട ബിൽഡിംഗ്’ ദുബായിയുടെ നഗരചരിത്രത്തിന്റെ ഭാഗമായി മാറുകയും ഷെയ്ഖ് സായിദ് റോഡിലെ വികസനത്തിന്റെ അടുത്ത ഘട്ടത്തിന് വഴിയൊരുക്കുകയും ചെയ്യും.

About The Author

web admin

See author's posts