നൂലും വളയങ്ങളും വെള്ളിച്ചങ്ങലയും; അൽ ഖുസാമിന്റെ പൈതൃക കഥ തുറന്ന് മുഹമ്മദ് ബിൻ റാഷിദ്

ദുബായ്,സെപ്റ്റംബർ 18,2026 : അൽ ഖുസാമിന്റെ ചരിത്രവും എമിറാത്തി സമൂഹത്തിലെ അതിന്റെ പ്രാധാന്യവും ആഴത്തിൽ പരിശോധിക്കുന്ന ഗവേഷണപദ്ധതി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം വിലയിരുത്തി. അൽ ഖുസാം ഒരു ഉപകരണം എന്നതിലുപരി തലമുറകളിലൂടെ എങ്ങനെ സാമൂഹികവും സാംസ്കാരികവുമായ പ്രതീകമായി മാറിയെന്നതാണ് പഠനം വിശദീകരിക്കുന്നത്. അതിന്റെ ഉപയോഗം, നിർമാണരീതി, പ്രതീകാത്മകത, എമിറാത്തി സമൂഹത്തിന്റെ ഓർമകളിലെ സ്ഥാനം എന്നിവയും ഗവേഷണത്തിൽ ഉൾപ്പെടുത്തിയിട്ടുണ്ട്. ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധമന്ത്രിയും ദുബായ് എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം, ദുബായ് ഭരണാധികാരിയുടെ ഓഫിസ് ചെയർമാൻ മുഹമ്മദ് അബ്ദുല്ല അൽ ഗർഗാവി, ദുബായ് ഉപഭരണാധികാരി ഷെയ്ഖ് അഹമ്മദ് ബിൻ മുഹമ്മദ് ബിൻ റാഷിദ് അൽ മക്തൂം എന്നിവരുടെ സാന്നിധ്യത്തിലായിരുന്നു പദ്ധതിയുടെ വിശദീകരണം. അൽ ഖുസാമിന്റെ ചരിത്രപരമായ വളർച്ച, പരമ്പരാഗത നിർമാണരീതികൾ, ഈ കരകൗശലവിദ്യ തലമുറകളിലേക്ക് കൈമാറുന്ന കരകൗശല വിദഗ്ധരുടെ പങ്ക് എന്നിവ പദ്ധതിയിൽ രേഖപ്പെടുത്തിയിട്ടുണ്ട്. ഗവേഷകരും വിദഗ്ധരും കരകൗശല വിദഗ്ധരും സൃഷ്ടിപരമായ മേഖലകളിലെ പ്രവർത്തകരും ഉൾപ്പെട്ട സംഘമാണ് പഠനം നടത്തിയത്.

അൽ ഖുസാമിന്റെ വികസനം പ്രധാനമായും മൂന്ന് ഘട്ടങ്ങളിലൂടെയാണ് പഠനം അവതരിപ്പിക്കുന്നത്. ഒട്ടകങ്ങളെ നിയന്ത്രിക്കുന്നതിനും മരുഭൂമിയിലൂടെയുള്ള യാത്രയ്ക്കും ഉപയോഗിച്ചിരുന്ന പ്രായോഗിക ഘട്ടം, പിന്നീട് പ്രാദേശിക വസ്ത്രധാരണത്തിന്റെയും ജീവിതരീതിയുടെയും ഭാഗമായ സാമൂഹിക ഘട്ടം, ഒടുവിൽ എമിറാത്തി വ്യക്തിത്വത്തിന്റെ സവിശേഷ പ്രതീകമായി മാറിയ ആധുനിക ഘട്ടം എന്നിവയാണവ. അറബ് ലോകത്തിന്റെ വിവിധ ഭാഗങ്ങളിൽ അൽ ഖുസാമിന്റെ ഉപയോഗം സംബന്ധിച്ച ചരിത്രരേഖകളും അറബി കവിതകളിലെ പരാമർശങ്ങളും പഠനത്തിൽ ഉൾപ്പെടുത്തിയിട്ടുണ്ട്. ഒട്ടകങ്ങൾ, യാത്ര, നേതൃത്വം എന്നിവയുമായി ബന്ധപ്പെട്ട കവിതകളിൽ പ്രത്യക്ഷപ്പെട്ട അൽ ഖുസാം പിന്നീട് നിശ്ചയദാർഢ്യം, ശക്തി, പ്രതിരോധശേഷി തുടങ്ങിയ ആശയങ്ങളുടെ പ്രതീകമായും മാറിയതായി ഗവേഷണം ചൂണ്ടിക്കാട്ടുന്നു. അൽ ഖുസാം നിർമിക്കുന്ന പരമ്പരാഗത രീതിയും പദ്ധതിയുടെ ഭാഗമായി രേഖപ്പെടുത്തിയിട്ടുണ്ട്. ആട്ടിൻരോമം ശേഖരിച്ച് നൂലാക്കി മാറ്റുകയും നൂലുകൾ പിരിച്ച് ശക്തമായ കയറുണ്ടാക്കുകയും തുടർന്ന് കെട്ടുകൾ, വളയങ്ങൾ, വെള്ളിച്ചങ്ങലകൾ എന്നിവ ചേർക്കുകയും ചെയ്യുന്ന രീതിയാണ് ഇതിൽ ഉൾപ്പെടുന്നത്.

ഈ പൈതൃക കരകൗശലവിദ്യ സംരക്ഷിക്കുന്നതിലും അടുത്ത തലമുറയ്ക്ക് കൈമാറുന്നതിലും എമിറാത്തി കരകൗശല വിദഗ്ധരുടെ പങ്കും പഠനം എടുത്തുകാട്ടുന്നു. അറിവ്, വൈദഗ്ധ്യം, അസംസ്കൃത വസ്തുക്കൾ, നിർമാണരീതികൾ, മനുഷ്യരുടെ ജീവിതകഥകൾ എന്നിവ ചേർന്ന സമഗ്രമായ പൈതൃകമേഖലയായാണ് അൽ ഖുസാമിനെ പദ്ധതിയിൽ അവതരിപ്പിക്കുന്നത്. അൽ ഖുസാമിന്റെ വളയങ്ങൾ, നൂലുകൾ, മറ്റ് സവിശേഷ രൂപങ്ങൾ എന്നിവയിൽനിന്ന് പ്രചോദനം ഉൾക്കൊണ്ട് ആധുനിക ഉൽപന്നങ്ങളും രൂപകൽപനകളും വികസിപ്പിക്കുന്നതിനുള്ള സാധ്യതകളും പഠനം അവതരിപ്പിക്കുന്നു. പാരമ്പര്യവും ആധുനികതയും സമന്വയിപ്പിക്കുന്ന പുതിയ ഉൽപന്നങ്ങളിലൂടെ അൽ ഖുസാമിനെ ദൈനംദിന ജീവിതത്തിലേക്ക് തിരിച്ചുകൊണ്ടുവരാനുള്ള ശ്രമങ്ങളും ഇതിന്റെ ഭാഗമാണ്.

About The Author

web admin

See author's posts