സ്കൂൾ ബെല്ലിന് മുമ്പേ RTA ഒരുങ്ങി; കുട്ടികളുടെ സുരക്ഷയ്ക്ക് വൻ മുന്നൊരുക്കം.

ദുബായ് , ഓഗസ്റ്റ് 24 2026 : പുതിയ അധ്യയന വർഷത്തിന് മുന്നോടിയായി വിദ്യാർഥികളുടെ സുരക്ഷയും സ്കൂൾ ഗതാഗത സംവിധാനങ്ങളുടെ കാര്യക്ഷമതയും ഉറപ്പാക്കാൻ വിപുലമായ പദ്ധതികളുമായി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി. 2026–27 അധ്യയന വർഷത്തേക്കുള്ള ഒരുക്കങ്ങളുടെ ഭാഗമായി സ്കൂൾ ബസുകളുടെ സുരക്ഷാ പരിശോധന ശക്തമാക്കുന്നതിനൊപ്പം പൊതുഗതാഗത സംവിധാനങ്ങളും കൂടുതൽ കാര്യക്ഷമമാക്കും. സ്കൂൾ ബസ് ഓപ്പറേറ്റർമാർക്ക് RTA പ്രത്യേക നിർദേശങ്ങൾ നൽകി. ബസുകളുടെ സാങ്കേതിക സജ്ജീകരണം, സമഗ്ര സുരക്ഷാ പരിശോധന, പ്രവർത്തന മാനദണ്ഡങ്ങളുടെ പാലനം, ഡ്രൈവർമാരുടെയും ബസ് അറ്റൻഡന്റുമാരുടെയും പെർമിറ്റുകളുടെ സാധുത എന്നിവ ഉറപ്പാക്കണമെന്നാണ് നിർദേശം.
ഇതിന്റെ ഭാഗമായി ദുബായിലെ സ്കൂളുകളിലും സ്കൂൾ ബസുകളിലും 30 ദിവസത്തെ പ്രത്യേക പരിശോധനാ ക്യാംപയിൻ നടത്തും. സുരക്ഷാ മാനദണ്ഡങ്ങളും പ്രവർത്തന ചട്ടങ്ങളും പാലിക്കുന്നുണ്ടോ എന്ന് പരിശോധനയിൽ ഉറപ്പാക്കും. ഡ്രൈവർമാരുടെയും അറ്റൻഡന്റുമാരുടെയും പെർമിറ്റുകളും പരിശോധിക്കും.

സ്കൂൾ ബസുകൾക്ക് പുറമെ മാതാപിതാക്കൾക്ക് കൂടുതൽ സുരക്ഷിതമായ യാത്രാ മാർഗങ്ങൾ ഒരുക്കുന്നതിനായി ഇ-ഹെയിൽ ലിമോസിൻ സേവനങ്ങളെയും RTA പിന്തുണയ്ക്കും. Careem School Rides, Uber Teens, BOLT School തുടങ്ങിയ സേവനങ്ങൾ ഇതിൽ ഉൾപ്പെടുന്നു.

സുരക്ഷാ റേറ്റിങ് മികച്ച ഡ്രൈവർമാരെയും ആധുനിക വാഹനങ്ങളെയും ഉൾപ്പെടുത്തി കുട്ടികൾക്ക് സുരക്ഷിതമായ യാത്ര ഉറപ്പാക്കുകയാണ് ലക്ഷ്യം.

അൽ ബർഷയിൽ Yango ആപ്പ് വഴി ലഭ്യമാകുന്ന School Ride Pooling പദ്ധതിയും തുടരും. വിദ്യാർഥികൾക്ക് പങ്കിട്ട യാത്രാ സൗകര്യം ലഭ്യമാക്കുന്നതിലൂടെ സ്കൂൾ യാത്രകൾ കൂടുതൽ സൗകര്യപ്രദമാക്കുകയാണ് പദ്ധതിയുടെ ലക്ഷ്യം.

അതേസമയം, Student nol Card ഉപയോഗിക്കുന്ന വിദ്യാർഥികൾക്ക് മെട്രോ, ട്രാം, പൊതുബസുകൾ ഉൾപ്പെടെയുള്ള RTA പൊതുഗതാഗത സേവനങ്ങളിൽ 50 ശതമാനം ഇളവും ലഭിക്കും.

സ്കൂൾ മേഖലകളിൽ കൂടുതൽ ടാക്സികളും ബസുകളും

സ്കൂൾ തുറക്കുന്നതും അടയ്ക്കുന്നതുമായ സമയങ്ങളിൽ വർധിക്കുന്ന യാത്രാ തിരക്ക് കണക്കിലെടുത്ത് ദുബായിലെ വിവിധ സ്കൂൾ മേഖലകളിൽ ടാക്സികളുടെ ലഭ്യത വർധിപ്പിക്കും.

അൽ നഹ്ദ, മുഹൈസിന, അൽ ബർഷ, അൽ ഖൂസ്, ദുബായ് സിലിക്കൺ ഒയാസിസ്, അൽ ഗർഹൂദ് തുടങ്ങിയ പ്രധാന മേഖലകളിലേക്ക് സർവീസ് നടത്തുന്ന 30ലേറെ ബസ് റൂട്ടുകളുടെ സർവീസ് വർധിപ്പിക്കും.

ഇതിലൂടെ കാത്തിരിപ്പ് സമയം കുറയ്ക്കാനും വിദ്യാർഥികൾക്കും രക്ഷിതാക്കൾക്കും കൂടുതൽ സുഗമമായ യാത്ര ഉറപ്പാക്കാനുമാണ് RTA ലക്ഷ്യമിടുന്നത്.

സ്കൂൾ ബസുകളിലും റൈഡ്-പൂളിങ്, റൈഡ്-ഹെയിലിങ് സേവനങ്ങളിലും സീറ്റ് ബെൽറ്റ് നിർബന്ധമാണ്. വിദ്യാർഥികളുടെ സുരക്ഷയ്ക്കാണ് ഏറ്റവും ഉയർന്ന പരിഗണന നൽകുന്നതെന്നും സുരക്ഷാ പരിശോധന, നിയമപാലനം, ഫീൽഡ് നിരീക്ഷണം, പൊതുഗതാഗത ശേഷി വർധിപ്പിക്കൽ, സാങ്കേതികവിദ്യാധിഷ്ഠിത യാത്രാ സംവിധാനങ്ങൾ എന്നിവ ഏകോപിപ്പിച്ചാണ് പുതിയ അധ്യയന വർഷത്തെ വരവേൽക്കുന്നതെന്നും RTA വ്യക്തമാക്കി.

About The Author

web admin

See author's posts