ദുബായ്, ഒക്ടോബർ 13, 2026 : യുഎഇയുടെ 2027 മുതൽ 2029 വരെയുള്ള മൂന്ന് വർഷത്തെ ഫെഡറൽ ബജറ്റിന് മന്ത്രിസഭ അംഗീകാരം നൽകി. ആകെ 292.5 ബില്യൺ ദിർഹമാണ് ബജറ്റിൽ അനുവദിച്ചിരിക്കുന്നത്. മുൻ മൂന്ന് വർഷത്തെ ബജറ്റുമായി താരതമ്യം ചെയ്യുമ്പോൾ 28.3 ശതമാനത്തിന്റെ വർധനവാണിത്.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് തീരുമാനം. 2027 സാമ്പത്തിക വർഷത്തേക്കുള്ള 90.1 ബില്യൺ ദിർഹത്തിന്റെ ഫെഡറൽ ബജറ്റിനും മന്ത്രിസഭ അംഗീകാരം നൽകി.
വിദ്യാഭ്യാസം, ആരോഗ്യം, പാർപ്പിടം എന്നിവയ്ക്ക് മുൻഗണന
വിദ്യാഭ്യാസം, ആരോഗ്യം, പാർപ്പിടം, സാമൂഹിക സേവനങ്ങൾ, പൗരന്മാരുടെ ജീവിതനിലവാരം, സ്ഥിരത എന്നിവയ്ക്കാണ് സർക്കാർ തുടർന്നും മുൻഗണന നൽകുന്നതെന്ന് ഷെയ്ഖ് മുഹമ്മദ് ബിൻ റാഷിദ് അൽ മക്തൂം വ്യക്തമാക്കി.
യുഎഇ പ്രസിഡന്റ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ നേതൃത്വത്തിൽ രാജ്യത്തിന്റെ നേട്ടങ്ങൾ സംരക്ഷിക്കുന്നതിനൊപ്പം ജനങ്ങൾക്ക് മികച്ച ജീവിതസാഹചര്യങ്ങൾ ഒരുക്കുന്നതിനുള്ള പ്രവർത്തനങ്ങൾ തുടരുമെന്നും അദ്ദേഹം അറിയിച്ചു.
2027ലെ ബജറ്റ് തുക വിവിധ മേഖലകൾക്ക്
2027 സാമ്പത്തിക വർഷത്തേക്കുള്ള 90.1 ബില്യൺ ദിർഹത്തിന്റെ ബജറ്റിൽ വിവിധ മേഖലകൾക്കായി അനുവദിച്ച തുക ഇങ്ങനെയാണ്.
* സാമൂഹിക വികസനവും പെൻഷനും: 34.6 ബില്യൺ ദിർഹം (38.4%)
* സർക്കാർ കാര്യങ്ങൾ: 29.1 ബില്യൺ ദിർഹം (32.3%)
* ഫെഡറൽ ചെലവുകൾ: 17.8 ബില്യൺ ദിർഹം (19.7%)
* സാമ്പത്തിക ആസ്തികളും നിക്ഷേപങ്ങളും: 5.6 ബില്യൺ ദിർഹം (6.2%)
* അടിസ്ഥാന സൗകര്യങ്ങളും സാമ്പത്തിക വിഭവങ്ങളും: 3 ബില്യൺ ദിർഹം (3.4%)
2027ലെ ബജറ്റിൽ ഏറ്റവും കൂടുതൽ തുക അനുവദിച്ചിരിക്കുന്നത് സാമൂഹിക വികസനത്തിനും പെൻഷനുകൾക്കുമാണ്.
വികസന പദ്ധതികൾക്കും സാങ്കേതികവിദ്യയ്ക്കും പ്രാധാന്യം
വിദ്യാഭ്യാസം, തൊഴിൽ, ആരോഗ്യസംരക്ഷണം, സാമൂഹിക സുരക്ഷ, വ്യവസായം, സാങ്കേതികവിദ്യ, ഊർജം, അടിസ്ഥാന സൗകര്യങ്ങൾ, സംസ്കാരം, മാധ്യമങ്ങൾ, കായികം തുടങ്ങിയ മേഖലകളുടെ വികസനത്തിനും പുതിയ ബജറ്റിൽ പ്രാധാന്യം നൽകിയിട്ടുണ്ട്.
സർക്കാർ പദ്ധതികൾക്കും വികസന പ്രവർത്തനങ്ങൾക്കും ആവശ്യമായ സാമ്പത്തിക സഹായം ദീർഘകാലത്തേക്ക് ഉറപ്പാക്കുകയാണ് മൂന്ന് വർഷത്തെ ബജറ്റ് പദ്ധതിയുടെ പ്രധാന ലക്ഷ്യം.
രാജ്യത്തിന്റെ നിലവിലെ വികസന ആവശ്യങ്ങൾ നിറവേറ്റുന്നതിനൊപ്പം ഭാവിയിലെ പദ്ധതികൾക്കും നിക്ഷേപങ്ങൾക്കും ആവശ്യമായ സാമ്പത്തിക പിന്തുണ നൽകാനും ബജറ്റ് സഹായിക്കുമെന്ന് സർക്കാർ വ്യക്തമാക്കി.
സാമ്പത്തിക വിഭവങ്ങൾ ഫലപ്രദമായി ഉപയോഗിക്കുന്നതിനും രാജ്യത്തിന്റെ സാമ്പത്തിക, സാമൂഹിക വികസനം ശക്തിപ്പെടുത്തുന്നതിനും പുതിയ ബജറ്റ് സഹായിക്കുമെന്നാണ് പ്രതീക്ഷിക്കുന്നത്.
About The Author
